Urretxuk teleirakurketa-sistemaren % 65 berrituko du, udalaren uraren kudeaketa hobetzen jarraitzeko

Udalak 2.500 kontagailu inguru berrituko ditu 2026 eta 2027 artean, duela hamarkada bat baino gehiago udalerrian ezarritako irakurketa adimenduneko sistema eguneratuz.

Jarduketa sarearen modernizazioa, kontsumoen kontrola hobetzea, balizko ihesak antzematea eta uraren kudeaketa eraginkorrago eta jasangarriago baterantz aurrera egitea helburu duen estrategia zabalago baten barruan kokatzen da.

Urretxuko Udalak uda honetan hasi du, Veolia-Aquarbe enpresa emakidadunaren bidez, 2.500 ur-kontagailu inguru pixkanaka berritzeko prozesua. Lanak 2026an eta 2027an egingo dira, eta gaur egungo teleirakurketa-sistemaren zati handi bat eguneratzea ahalbidetuko dute.

Ez da sistema berri bat ezarriko. Urretxuk duela hamarkada bat baino gehiago ditu teleirakurketa bidezko kontagailuak, eta horiei esker kontsumoen jarraipena egin daiteke kontagailu bakoitzera fisikoki joan beharrik gabe. Gaur egun, udal-sareak 3.855 kontagailu inguru ditu.

Ekipo horietako asko beren bizitza erabilgarriaren amaierara iristen ari dira. Horiek ordezkatzeko beharra eguneratze teknologikoari ez ezik, kontrol metrologikoari buruzko araudiari ere lotuta dago; izan ere, araudi horrek, oro har, gehienez 12 urteko epea ezartzen du mota honetako kontagailuentzat.

Informazio gehiago, ura hobeto kudeatzeko

Ekipo berriei esker, kontsumoei buruzko informazio eguneratuagoa izango da eta egoera ezohikoak errazago antzeman ahal izango dira, hala nola etengabeko kontsumoak edo ihesekin lotuta egon daitezkeen kontsumo-igoerak. Horrek aukera emango du balizko gorabeheren aurrean azkarrago jarduteko eta sarearen ezagutza eta kontrola hobetzeko.

Gainera, Urretxuk eraginkortasun-maila handia du abiapuntu. Udalak eskatutako kanpo-azterlan baten arabera, 2022an erregistratutako ur-bolumena sisteman sartutako uraren % 95,48 izan zen. Maila horiei eusteko eta, ahal den neurrian, hobetzeko, beharrezkoa da azpiegiturak eta neurketa- eta kontrol-sistemak berritzen jarraitzea.

Estrategia zabalago baten barruan

Kontagailuen berritzea uraren zikloa hobetzeko eta modernizatzeko udal-estrategia zabalago baten barruan kokatzen da.

Azken urteotan, Udalak behe-horniduraren kudeaketa-gaitasuna mantendu eta modernizatzearen aldeko apustua egin du, sarearen hobekuntza eta udalaren beraren azpiegitura eta ur-baliabideen aprobetxamendua uztartuz.

Ildo berean kokatzen dira Irigongo biltegia sarearen elementu erregulatzaile gisa berreskuratzeko aurreikusitako jarduketak, baita Sasiola eta Juan Iturriko udal-hartuneak aprobetxatzekoak ere. Helburua horniduraren segurtasuna handitzea, eskura dauden baliabideak hobeto aprobetxatzea eta goi-hornidurako uraren erosketarekiko mendekotasuna pixkanaka murriztea da.

Teleirakurketa-sistema berritzeak estrategia hori osatzen du, sarean gertatzen denari buruzko informazio hobea eskainiz eta baliabide mugatu baten eta oinarrizko zerbitzu publiko baten kudeaketa eraginkorragoa erraztuz.

Berritze progresiboa 2026an eta 2027an

Lanak pixkanaka egingo dira, atariz atari eta eraikinez eraikin, 2026an eta 2027an, gutxi gorabehera 2.500 kontagailu berritu arte. Etxebizitza edo lokal baten barrura sartzea beharrezkoa denean, lanen ardura duen pertsonala aldez aurretik jarriko da harremanetan erabiltzaileekin.

Jarduketa Veolia-Aquarbek zerbitzuaren esparruan bere gain hartutako betebeharren barruan dago, eta kontagailua ordezkatzeak ez die banakako kostu gehigarririk ekarriko erabiltzaileei.

Jarduketa honekin, Urretxuk hiru printzipiotan oinarritutako ereduan aurrera egiten jarraitzen du: udal-azpiegiturak mantentzea eta modernizatzea, eskura dauden baliabideak eraginkortasunez erabiltzea eta sareari buruzko informazioa eta kontrola hobetzea.