Datorren azaroaren 24an, arratsaldeko 19:00etan Eguzki Art Zinema ekoiztetxearen OMBUAREN ITZALA proiektua, Pedro Mari Otañoren figuraren ingurukoa, aurkeztuko da Urretxuko Udaletxeko atarian.

Aurkezpen honetan, Patxi Bisquert aktore ezagunak eta ekimenaren sustatzaile nagusiak, proiektu honen berri emango du; Pello Mari Otaño (Zizurkil, 1857 - Rosario, Argentina, 1910) bertsolariaren inguruko filma egiteko proiektu partehartzailea, auzolanean oinarritua. 

Filma Otañoren bizitzako azken bi hamarkadetan egongo da oinarritua, 1890etik 1910era alegia. Hauek urte garrantzitsuak izan ziren Otañorentzat, baita euskal gizartearentzat ere: ekonomikoki lur jota zegoen herria, gazteak erbesterako bidean, Amerikak egitera joaten ziren… politikoki ere egoera oso nahasia eta interesgarria zen… Bisquerten hitzetan “urte zoragarriak dira filmatzeko”.   

Otañoren biografia bere garaiko aldaketa, pasarte eta mugimendu nagusiak islatzeko gai den biografia horietakoa da, gizonaren bizitza aztertuz bere garaiko historia azaltzen duen horietakoa, alegia: baserri batean jaioa, foruen abolizioaren ondorioak bizi behar izan zituena, herritik kanpora migratutakoa, garaiko gazte askoren antzera, industriaguneetako ideia sozialistak ere entzuten hasten da lehenengoz, abertzaletasuna ere gorpuzten ikusiko du… 

Proiektu honen helburua da jendearentzat hain ezezaguna den, eta ahanzturan erortzeko arriskuan dagoen hori guztia fikziozko film batean bildu eta belaunaldi berriei helaraztea. Horretarako auzolanera eta herrigintzara jo dute Zinema Art ekoiztetxekoak. Hala, hamar euroko ekarpena egiteko aukera izango da ekimena bultzatu ahal izateko, eta trukean filma ikusteko sarrera bat eskuratuko dute herritarrek, helburua 300 000 euro lortzea izango da.

Azalpen hauek guztiak gertutik entzuteko eta ekimen honen atzean dauden eragileekin solasean egiteko aukera bikaina izango dugu datorren hilaren 24an, 19:00etan Urretxuko Udaletxeko atarian.

Bizi dugun osasun-egoera dela eta, gomendagarria da aurrez izena ematea, 943038088 telefonora deituta edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera idatzita.

Hemen duzue Pedro Mari Otañoren bizitzaren aipamen bat.